تعرف إيه عن ASMR ?

تخيل كده عندك أرق مزمن حاولت بكل الوصفات اللي اقترحها عليك خالك وعمك واحمد زميلك في الشغل العالم ببواطن الامور ومفيش فايدة لحد ما يجي وائل صاحبك يقولك ما تروح لدكتور نفسي
ف انت ما تكدبش خبر. وتروح للدكتور وتمدد ع الشيزلونج
يقولك بهدوء مالك يابني ايه مشكلتك
مبنامش يا دكتور شربت لبن دافي و بطلت اتعشا وبعدين اتعشيت عشان تقيل وعملت كل حاجة اني انام ابداا... يرد عليك الدكتور بثقة دي حالة بسيطة متقلقش ويروح فاتح درج مخرج منه خيارة و يقرب منك ويطلب انك تغمض عينيك ويبدأ يقطم.من الخيارة ويقرمشها جنب ودنك فتلاقي نفسك روحت ف سابع نووومة شوفت العلاج بسيط اازاي?!!.....

المشهد اللي حكيناه ده مش هزار دي حقيقة بس مش هتروح للدكتور انا احكيلك .. بص يا سيدي في ظاهرة بتحصل في العالم كله وهي
ASMR
ودي الحروف الاولى من
  Auotonomous sensory meridian response
بمعنى الاستجابة الحسية الزوالية الذاتية
يعني ايه الكلام ده
تعالوا نحكي القصة من البداية
الظاهرة دي انتشرت من حوالي 11 سنة و مؤخرا ابتدت تتعرف في الوطن العربي التجربة الغريبة دي
طيب ايه هي التجربة
بدأت ازاي
منين جات التسمية دي
وايه رأي العلم فيها
تعالوا  نجاوب كل الاسئلة دي
....
ASMR هو ردة فعل الجسم نتيجة تحفيزه سواء بصريا او سمعيا او حسيا
فاكرين فريد شوقي لما كان بيحب ينام على صوت الغسالة في فيلم صاحب الجلالة ?? اهو طلع في توصيف للحالة دي تخيلوا ....
المحفز بقى ممكن يكون شخص او ألة زي غسالة فريد شوقي كده ردة الفعل الجسدية بقى بتكون على شكل شعور بالقشعريرة او الحكة مثلا
ومن اكتر الاصوات المحفزة اللي انتشرت اصوات الهمس
و ازمر عادة بيستخدم لأغراض العلاج زي تخفيف حالة الاكتئاب أو الالام المزمنة او الارق ..
بس الغريبة برغم النتايج و اقبال عدد كبير جدا على النوع ده من العلاج مفيش أي دليل علمي يدعم قدرتها على تحقيق النتايج دي ...
......
سنة 2007 نشر شاب على منتدى صحي تابع لموقع ستيدي هيلث موضوع وصف فيه اختباره  لمجموعة من المشاعر المعينة من طفولته بيتم تحفيزها نتيجة احداث عشوائية أو مشاهدات معينة و التحفيز ده بيخليه يحس احساس الشخص لما حد يمرر صوابعه ببطء على جلده بسرعة !!
حصل تفاعل كبير مع الموضوع بتجارب مشابهة و اتوسعت المناقشة و انتشرت على منتديات تانية
سنة 2010 اتأسست مدونة اسمها المشاعر التي لا اسم لها .. وبعدها اسست بنت اسمها چينيڤر ألين يوم 25 فبراير 2010

صفحة على فيس بوك باسم ازمر ...

الصفحة انتشرت بسرعة واتشهرت جدااا في دول مختلفة بس خلينا نقول انه برغم تفاجئ العالم بالظاهرة الا ان الظاهرة مكنتش جديدة تماما احنا مثلا عندنا فريد شوقي والغسالة ... و في رواية مسز دالواي للكاتبة ڤيرچينيا ولوف اللي اتنشرت سنة 1925 بنلاقيها بتتكلم عن تأثير صوت رجل عميق و بتوصف الشعور بانه احساس بالدغدغة ادت بانتقالها للعمود الفقري للاصابة بالقشعريرة ....

قبل ما يتم الاستقرار على اسم ازمر كان في مجموعة كبيرة من الاسماء لوصف الحالة واغلبها بتشمل كلمة نشوة زي نشوة الدماغ وغيره
حصل خلاف لما ابتدت تتكرر الاوصاف بكلمة نشوة و ده كان سنة 2010 البعض رفض ربط كلمة نشوة بالنوع ده من المشاعر لأن الكلمة بتعني تحفيز لمشاعر جنسية و ده مش المعنى الوحيد لازمر
حصل وقتها الانقسام في فروع ازمر و اختارت چينيفر الين التسمية اللي حاولت بيها توصيف المشاعر بأقرب كلمات مناسبة توضح او تشرح حالة الجسد في حال تعرضه للمحفزات وبقيت التسمية المتفق عليها ازمر
Autonomous بمعنى العفوية او المسيطر عليها
Sensory حسية او خاصة بالحواس
Meridian ذروة المشاعر
Response الاستجابة
....
طيب ايه رأي العلم ?
زي ما قلنا مفيش اي ابحاث علمية عن الظاهرة برغم انتشارها و حتى الابحاث النفسية تجاهلتها
بس بنلاقي استبيان بيعمله د نيك ديفيس في جامعة سوانزي على 500 شخص
بتعريضهم لاكتر من نوع من المحفزات و اتضح ان اكتر المقاطع او المحفزات تأثيرا هي اصوات الهمس
وتوصل 95% منهم انه التأثير الغالب نتيجة التعرض للمحفزات دي كان الاسترخاء وتقليل حدة التوتر والتخلص من الارق !!!
 ولكن طبعا ده عدد قليل ولا يمكن الاعتماد على النوع ده من الدراسات واعتبارها رأي علمي داعم للظاهرة ولا بيوضح لنا الاسباب الحقيقية للظاهرة دي ولكنها خطوة لا يستهان بها .. ويمكن نشوف ابحاث علمية حقيقية قريب تقولنا ايه اللي بيحصل
اقعدوا بالعافية .

المصادر /

https://en.m.wikipedia.org/wiki/Autonomous_sensory_meridian_response

https://www.independent.co.uk/life-style/asmr-what-is-it-autonomous-sensory-meridian-response-ikea-advert-relaxation-video-a7887881.html