بكابورت طباخيين

في البداية كانت قناة فتافيت قناة لطيفة شيفات متخصصين أساتذة بجد من كل الوطن العربي حاجة تشرف
لما بقيت فتافيت قناة باشتراك ...

لاقينا قناة cbc سفرة استلمت الراية ك قناة مصرية للطبخ ومجانية نسخة مشابهة لقناة فتافيت  بس أقل شوية
كأن مامتك عملت لك فتافيت في البيت وكدزه 😜

قلنا وماله اهو شيفات برضه و الناس تتعلم منهم
و شيفات المستقبل اللي لسه بيدرسوا فنون الطبخ يعرفوا ان مجهودهم و تعبهم مش رايح هدر وهيبقوا شيفات كبار
لهم برامج وجمهور ..

مرة واحدة اتحول الموضوع لبكابورت حقيقي
مصطبة و سبوبة وكل واحدة عزمت جارتها على بامية قالت لها تسلم ايدك طلعت لنا ع القنوات تقدم برامج طبخ !!
طيب لو انتم عايزين السبوبة و تليفونات و الهبل اللي بنشوفه ده هاتوا ناس أكاديميين ايه العاهات اللي بتقدموها دي !!

قناة صدى البلد جايبين واحدة ست حرفيا مبتعملش حاجة في شيف بيشتغل مختفي ورا الكاميرا  وهي نجمة البرنامج قرايبها وجيرانها يتصلوا وهي كل شغلها ايوه يا حبيبتشي ومفيش مرة لمحت برنامجها بالصدفة الا والاقيها بتتكلم عن الحاسدين لها او عن مرضها بسبب العين والحسد طيب ما تقعدي في بيتك يا حاجة تطلعي ليه ساعة ع الهوا تطلعي ميتين الناس

قناة بانوراما فوود لا تقل قرف و هري عن صدى البلد ستات بتفتي وتسرق طبخات من فيس بوك وتقدمها على انها اختراع خاص بيها كدب عيني عينك   و خناقات مع الاعداد وحرق اكل و هبل عجيب مالوش معنى وفتي في اي حاجة , الشيفات  اللي شغلتهم شيف فعلا واحد او اتنين في القناة

اسهال برامج طبخ يومي اسهال من العك و التخلف وعدم المهنية لا هما اعلاميين ولا هما شيفات ولا مفهوم ايه سبب اهدار كل ده وتقديم ناس غير جديرة بالظهور ع الشاشات .. ليه شباب تتعب وتدرس سنين عشان يكونوا أكاديميين يتساووا بالناس دي ازاي أي واحد واقف يهذي ويسرق يتقال عنه شيف ?!!!

هل النوع ده من البرامج ما بيأثرش على اسعار الخضر و الفاكهة و اللحوم وغيره الاستهلاك الغير طبيعي لهذا الكم ميأثرش ع السوق المصري ويضر بالمواطن اكتر ما هو متنيل ???

 مفيش قناة تليفزيونية مبتقدمش برامج طبخ
ايه كل العك اللي اتفتح علينا ده مش فاهمة مش لاقيين حاجة تقدموها بجد خلاص الافكار نضبت والبرامج اللي لها لازمة مبقاش لها مكان اعلامنا بقى عبارة عن ستات بتعك يا ستات بتفتي !!!